राणी चन्नम्मा विद्यापीठाचा 13 वा दिक्षांत समारंभ 11 एप्रिल रोजी

बेळगाव ( bn7 news) : बेळगाव येथील राणी चन्नम्मा विद्यापीठाचा 13 वा दिक्षांत समारंभ 11 एप्रिल रोजी सकाळी 11 वाजता विश्वेश्वरय्या तांत्रिक विद्यापीठातील डॉ. ए.पी.जे. अब्दुल कलाम सभागृहात संपन्न होणार आहे. विद्यापीठाचे कुलगुरू प्रा. सी.एम. त्यागराज यांनी ही माहिती दिली आहे.
या समारंभाच्या अध्यक्षस्थानी राज्यपाल थावरचंद गेहलोत राहणार असून, उच्च शिक्षण मंत्री डॉ. एम.सी. सुधाकर विद्यार्थ्यांना मार्गदर्शन करणार आहेत. पद्मश्री सन्मानित प्रा. गणेश नारायणदास देवी यांचे प्रमुख दिक्षांत भाषण होणार आहे.

या दिक्षांत समारंभात एकूण 46013 पदवीधर, 2866 पदव्यूत्तर विद्यार्थ्यांना प्रमाणपत्रे वितरित केली जातील. यामध्ये 11 विद्यार्थ्यांना सुवर्णपदके, तर काहींना रोख बक्षिसे देण्यात येणार आहेत. याशिवाय 20 पीएच.डी. पदव्या प्रदान केल्या जाणार आहेत, असेही त्यांनी सांगितले.
कृषी, शिक्षण व सामाजिक समरसतेतील कार्यासाठी निडसोजी मठाचे जगद्गुरू शिवलिंगेश्वर स्वामी यांना डॉक्टर ऑफ लेटर्स, कायदा, न्याय व राज्यघटनेच्या जागृतीसाठी माजी मुख्य न्यायाधीश एच.एन. नागमोहनदास यांना डॉक्टर ऑफ लॉ, तसेच शिक्षण, सहकार व सामाजिक सेवेत योगदानासाठी विजापूर येथील सीक्याबचे अध्यक्ष शमसुद्दीन अब्दुल्ला पुणेकरी यांना डॉक्टर ऑफ सायन्स ही सन्माननीय पदवी प्रदान करण्यात येणार असल्याचेही कुलगुरू प्रा. सी.एम. त्यागराज यांनी सांगितले आहे.

सन 2023 चा दिक्षांत समारंभ 2024 मध्ये पार पडला होता. सन 2024 चा समारंभ आता होत असून, या शैक्षणिक वर्षाचा म्हणजेच 2025 चा समारंभ यावर्षी नोव्हेंबरमध्ये घेण्यात येणार आहे. यामुळे शैक्षणिक वर्ष वेळेवर सुरू होऊन विद्यार्थ्यांना शैक्षणिकदृष्ट्या फायदा होईल, असे कुलगुरु सी.एम. त्यागराज यांनी स्पष्ट केले.