भर उन्हाळ्यात घालतोय गोकाक धबधबा पर्यटकांना साद ...!

गोकाक : रणरणत्या उन्हाळ्यातही गोकाकचा धबधबा पर्यटकांना साद घालीत आहे. धबधब्याचे विहंगमय दृश्य पाहण्याजोगे आहे.

गेल्या तीन दिवसांपासून टप्प्याटप्प्याने तब्बल दीड टीएमसी पाण्याचा विसर्ग करण्यात आला असून, दररोज मोठ्या प्रमाणावर पाणी सोडले जात असल्याने गोकाकचा धबधबा भरभरून वाहत आहे. तब्बल 180 फूट उंचीवरून कोसळणारा हा धबधबा पाहणे म्हणजे पर्यटकांसाठी एक पर्वणीच ठरत आहे.

पावसाळ्यात हजारो पर्यटकांना आकर्षित करणारा हा धबधबा आता उन्हाळ्यातही जलप्रपाताच्या रौद्र स्वरूपात पाहायला मिळत आहे.

बेळगाव जिल्ह्यातील गोकाकचा धबधबा बेळगावसह आसपासच्या जिल्ह्यातील पर्यटकांसाठी एक पर्यटनस्थळ आहे. उन्हाळ्यातही धबधबा आपले सौन्दर्य राखून असून अंगाला चटके देणाऱ्या उन्हाळ्यातही गोकाक फॉल्समध्ये जलवैभवाने भरलेले दृश्य पर्यटकांचे लक्ष वेधून घेत आहे. घटप्रभा जलाशयातून पाण्याचा विसर्ग केल्याने गोकाक धबधबा भर उन्हाळ्याताही प्रचंड वेगाने वाहत असून, हे दृश्य अनुभवण्यासाठी पर्यटक मोठ्या संख्येने गर्दी करत आहेत.