चोरट्यांनी फोडले एटीएम मशीन : चोरली 18 लाखांची रक्कम : भल्या पहाटे मारला डल्ला

कलबुर्गी : झटपट पैशासाठी चोरट्यांनी थेट एटीएम मशीन फोडून 18 लाखांची रोकड पळविली. कलबुर्गी शहरातील रिंगरोडवर आज भल्या पहाटे 4 च्या दरम्यान चोरट्यांनी हा कारनामा केला.
खबरदारी म्हणून चोरट्यांनी एटीएम सेंटरच्या सीसीटीव्ही कॅमेऱ्यांना काळा स्प्रे मारून निकामी केले. त्यामुळे सीसीटीव्ही कुचकामी ठरली. आणि मग चोरट्यांनी आपले काम बिनभोबाटपणे केले.

पहाटे 4 च्या दरम्यान लोक साखर झोपेत असताना चोरटे कलबुर्गी शहरातील रिंगरोडवरील रामनगर येथील स्टेट बँक ऑफ इंडियाच्या (एसबीआय) एटीएम सेंटरमध्ये शिरले. आपली छबी सीसीटीव्ही कॅमेऱ्यात कैद होऊ नये याची पुरेपूर दक्षता म्हणून चोरट्यांनी तेथील सीसीटीव्ही कॅमेऱ्यावर काळा स्प्रे मारून कॅमेरे निष्क्रिय केले. यानंतर गॅस कटरच्या सहाय्याने एटीएम यंत्र फोडले आणि मशिनमधील 18 लाखांची रोकड घेऊन पोबारा केला.

बँकेच्या कर्मचाऱ्यांनी मंगळवारी सायंकाळी 6 वाजता मशीनमध्ये रोकड भरली होती. ती बुधवारी भल्या पहाटे चोरट्यांनी रिकामी केली. सब अर्बन पोलीस स्टेशनच्या हद्दीत ही घटना घडली असून पोलीस फरार आरोपींचा शोध घेत आहेत.