' हिट अँड रन ' : लक्ष्मी हेब्बाळकर यांच्या गाडीला ठोकरून फरार झालेला ट्रक चालक चतुर्भुज

बेळगाव : महिला आणि बालकल्याण विभागाच्या मंत्री लक्ष्मी हेब्बाळकर यांच्या वाहनाला धडक देऊन पोबारा केलेल्या ट्रक चालकाच्या मुसक्या पोलिसांनी तब्बल 3 महिन्यांनी आवळल्या.
मधुकर कोंडीराम सोमवंशी (वय 65, राहणार तक्कारवाडी,तालुका-इंदापूर, जिल्हा पुणे, महाराष्ट्र ) असे तीन महिन्यानंतर पोलिसांच्या जाळ्यात अडकलेल्या ट्रक चालकाचे नाव आहे.

14 जानेवारी रोजी कित्तूर तालुक्यातील अंबडगट्टी गावाजवळ इंदापूरच्या मधुकर कोंडीराम सोमवंशी नावाच्या ट्रक चालकाने महिला आणि बालकल्याण विभागाच्या मंत्री लक्ष्मी हेब्बाळकर यांच्या वाहनाला ठोकर देऊन पोबारा केला होता. याप्रकरणी हेब्बाळकर यांच्या वाहनचालकाने कित्तूर पोलीस ठाण्यात "हिट अँड रन"चा गुन्हा नोंदवला होता.

गुन्हा नोंदवून घेऊन पोलिसांनी अपघात स्थळी सापडलेल्या पुराव्यांमध्ये ट्रकच्या रंगाचा नमुना, तसेच अन्य महत्त्वाची माहिती एफएसएल (फॉरेन्सिक सायन्स लॅबोरेटरी) कडे पाठविण्यात आली होती.
त्याचबरोबर, घटनास्थळावरील सीसीटीव्ही फुटेजची तपासणीही करण्यात आली होती. या आधारे ट्रकचा शोध घेण्यात आला आणि अखेर तीन महिन्यांनी पोलिसांनी चालकाच्या मुसक्या आवळल्या. जिल्हा पोलीस अधीक्षक भीमाशंकर गुळेद यांनी ही माहिती दिली आहे.