आयुक्तांनी केला महानगरपालिका जनगणना अधिकाऱ्यांचा गौरव

बेळगाव : जनगणनेचे काम आठवडाभर आधी यशस्वीपणे पूर्ण करणाऱ्या महानगरपालिकेच्या जनगणना अधिकाऱ्यांचे बेळगाव महापालिका आयुक्त कार्तिक गुप्ता यांनी गुरुवारी अभिनंदन केले. यावेळी जनगणना अधिकाऱ्यांना अभिनंदनपत्र देऊन सन्मानित करण्यात आले.

महानगरपालिका कार्यालयात आयोजित कार्यक्रमात बोलताना आयुक्त कार्तिक गुप्ता म्हणाले की, सरकारी कर्मचाऱ्यांना देशाच्या सीमेवर जाऊन लढण्याची संधी मिळत नसली तरी जनगणना, निवडणुका, पल्स पोलिओ आणि कोरोना काळात कर्मचाऱ्यांनी अंतर्गत प्रशासनात सैनिकांप्रमाणे काम केले आहे. हीदेखील राष्ट्रसेवाच आहे. अनेक तांत्रिक अडचणी आणि तीव्र उष्णता असतानाही जनगणना अधिकारी, पर्यवेक्षक आणि कर्मचाऱ्यांनी अल्पावधीत जनगणनेचे काम पूर्ण केले, असे त्यांनी सांगितले.
जनगणनेसाठी एकूण 1200 कर्मचाऱ्यांची नियुक्ती करण्यात आली होती. तसेच आठ ब्लॉक तयार करण्यात आले होते. 50 अधिकाऱ्यांच्या एका तुकडीला तीन दिवसांचे प्रशिक्षण देण्यात आले. सात चार्ज अधिकाऱ्यांनी पर्यवेक्षक म्हणून काम पाहिले.
महानगरपालिका आयुक्तांच्या मार्गदर्शनामुळे आणि कर्मचाऱ्यांच्या उत्तम समन्वयामुळे हे काम यशस्वी झाले, असे उपआयुक्त (महसूल) डॉ. सिद्धू यांनी सांगितले.
यावेळी प्रशासन उपआयुक्त उदयकुमार तलवार यांच्यासह इतर अधिकारी व कर्मचारी उपस्थित होते.