डोंगरावरून अचानक कोसळले मोठे खडक : झाला वाहनांचा चुराडा

सौंदत्ती : बेकायदेशीर खाणकाम चालू असताना अचानकपणे डोंगरावरील मोठमोठे खडक कोसळू लागले आणि कोसळणाऱ्या त्या दगडाखाली आलेल्या वाहनांचा चुराडा झाला.
सौंदत्ती तालुक्यातील यड्रावी गावात बुधवारी रात्री सुमारे 10.30 च्या सुमारास ही घटना घडली. या दुर्घटनेत एक जेसीबी आणि ट्रॅक्टर पूर्णपणे खराब झाले. खडकांच्या खाली काही मजूर अडकल्याची शक्यता व्यक्त करण्यात येत आहे.

डोंगराच्या पायथ्याशी बेकायदेशीर खाणकाम सुरू असताना अचानकपणे डोंगरावरून मोठे खडक खाली कोसळले आणि एकच गोंधळ उडाला. घटनेची माहिती मिळताच सौंदत्ती येथील अग्निशमन दल घटनास्थळी दाखल झाले. त्यांना कोसळलेल्या खडकांखाली पूर्णतः चुरडलेली वाहने आढळून आली, मात्र खडकाखाली कोणी मजूर अडकले आहे का, हे स्पष्ट झालेले नाही. रात्री अंधारामुळे शोधमोहीमेस अडथळा निर्माण झाला होता. सकाळी पुन्हा दगड हटवून शोधकार्य हाती घेण्यात आले होते.
गावात खाणकाम करणारे काहीजण बेपत्ता असल्याची चर्चा असल्याने खडकांखाली ते मजूर अडकले की काय ? अशी भिती व्यक्त होत आहे.