राज्य परिवहनने अवघ्या 10 दिवसांत मिळविला 9 कोटींचा महसूल !

बेंगळूर : कर्नाटक सरकारने महिलांसाठी सुरू केलेल्या शक्ती योजनेअंतर्गत मोफत बससेवेमुळे राज्यातील परिवहन महामंडळांचे आर्थिक गणित कोलमडण्याची शक्यता वर्तविण्यात येत होती. मात्र, तसे काहीही झाले नसून राज्य परिवहन मंडळ तोट्यात नाही तर फायद्यात आले आहे.

कल्याण कर्नाटक रस्ते परिवहन महामंडळ (KKRTC) ने केवळ 10 दिवसांत तब्बल 9 कोटी 10 लाख रुपये महसूल कमावला आहे.

आंध्र प्रदेशातील प्रसिद्ध मल्लिकार्जुन मंदिर हे केवळ ज्योतिर्लिंग म्हणून नव्हे, तर कर्नाटकातील लाखो लोकांचे श्रद्धास्थान आहे. त्यामुळे दरवर्षी येथे मोठ्या प्रमाणावर भाविक गर्दी करतात.

यंदा गुढीपाडवा सणानिमित्त श्री मल्लिकार्जुन ज्योतिर्लिंग मंदिर येथे आयोजित यात्रेमुळे लाखोंच्या संख्येने भाविकांनी दर्शनासाठी गर्दी केली होती. या पार्श्वभूमीवर श्रीशैल यात्रेमुळे विजापूर, बळ्ळारी, रायचूर, कोप्पळ, कलबुर्गी आणि बीदर या सहा विभागांतून श्रीशैलकडे विशेष बससेवा सुरू केली होती. या बससेवेअंतर्गत अवघ्या 10 दिवसांत 1857 बसफेऱ्या झाल्या. शेकडो प्रवाशांनी प्रवास केला आणि यामुळे कल्याण कर्नाटक महामंडळाला या 10 दिवसांत 9 कोटी 10 लाख रुपयांचा थेट महसूल मिळाला.
मागील वर्षी देखील या यात्रेतून कर्नाटक रस्ते परिवहन महामंडळने 7 कोटींपेक्षा अधिक महसूल मिळवला होता.

यंदा ‘शक्ती’ योजनेअंतर्गत महिलांना मोफत प्रवास उपलब्ध करून देण्यात आला असल्याने परिवहनला कदाचित तोटा सहन करावा लागेल, अशी शक्यता होती. पण, परिवहनने मागील यात्रेपेक्षा जादा महसूल यावर्षी मिळविला आहे.

परिवहन विभागाला सरकारकडून अनुदान दिलं जात असलं, तरी वेळोवेळी होणाऱ्या विलंबामुळे आर्थिक अडचणी निर्माण होत होत्या. मात्र, आर्थिक वर्षाच्या सुरुवातीलाच आलेल्या या उत्पन्नामुळे महामंडळाच्या व्यवस्थापनात समाधान व्यक्त होत आहे.