आता शाळांमध्ये योग व आयुष पद्धतींना मिळणार चालना ..!

बेळगाव : जिल्ह्यातील सर्व सरकारी, खासगी व अनुदानित शाळांमध्ये योग आणि आयुष पद्धती अधिक प्रभावीपणे राबवण्यासाठी बेळगाव जिल्हा परिषदेकडून विशेष पाऊले उचलली जाणार आहेत. त्या अनुषंगाने शारीरिक शिक्षण शिक्षकांना योग प्रशिक्षण देणे, विद्यार्थ्यांना सोप्या योगासनांचे प्रात्यक्षिक दाखवणे तसेच आयुष औषधी वनस्पतींबाबत माहिती देणे याकडे विशेष लक्ष दिले जाणार आहे.

जिल्हा परिषदेचे मुख्य कार्यकारी अधिकारी राहुल शिंदे यांनी जिल्हा आयुष अधिकारी तसेच तालुका स्तरावरील अधिकाऱ्यांना या उपक्रमांना बळकटी देण्याचे निर्देश दिले आहेत. जिल्ह्यातील आयुष डॉक्टरांनी आयुष उपचार पद्धती मुख्य प्रवाहात आणण्यासाठी लोकांशी व लोकप्रतिनिधींशी चांगले संबंध ठेवून सेवा अधिक प्रभावीपणे पुरवाव्यात, असे राहुल शिंदे यांनी नुकत्याच बोलाविण्यात आलेल्या आढावा बैठकीत सांगितले.
यासंदर्भात सर्व वैद्यकीय अधिकाऱ्यांना त्यांच्या कार्यक्षेत्रातील किमान तीन निवासी शाळा दत्तक घेण्याचे निर्देश देण्यात आले आहेत. या शाळांमध्ये नियमित आरोग्य तपासणी, औषध वितरण आणि योगविषयक माहिती देऊन त्याचा अहवाल सादर करण्यास सांगितले आहे.
जिल्हा आयुष रुग्णालयात ‘आशा किरण-दृष्टी’ केंद्र सुरू करण्यात आले असल्याची माहिती देत, पंचकर्म आणि अग्निकर्म यांसारख्या उपचार पद्धती उपलब्ध करून दिल्याबद्दल त्यांनी समाधान व्यक्त केले.
आयुष विभागाच्या विविध योजनांची जनजागृती करण्याचे तसेच उपलब्ध आयईसी निधीचा योग्य वापर करण्याचे निर्देशही अधिकाऱ्यांना देण्यात आले. कोणत्याही रुग्णालयात औषधांचा तुटवडा भासू नये याची दक्षता घेण्यास सांगितले.
या बैठकीस राज्य आयुष समन्वय अधिकारी चंद्रशेखर सिद्दापूर, जिल्हा आयुष अधिकारी श्रीकांत सुनधोळी तसेच इतर अधिकारी व कर्मचारी उपस्थित होते.