बेंगळूर – 30 लाख किंवा त्यापेक्षा जास्त मूल्याच्या मालमत्ता खरेदीसाठी विक्रेते आणि खरेदीदारांनी पॅन क्रमांक (Permanent Account Number) अनिवार्यपणे सादर करावे, अशी सक्त सूचना राज्याच्या नोंदणी आणि मुद्रांक विभागाने दिली आहे. पॅन तपशील न दिल्यास मालमत्तेची नोंदणी केली जाणार नाही, असे राज्याच्या नोंदणी आणि मुद्रांक विभागाने म्हटले आहे.
नोंदणी महानिरीक्षक व मुद्रांक आयुक्तांनी सर्व जिल्हा नोंदणी अधिकारी आणि उप-नोंदणी कार्यालयांना यासंबंधी परिपत्रक जारी केले आहे.
30 लाख रुपये किंवा त्यापेक्षा अधिक मूल्याच्या मालमत्तांच्या नोंदणीसंबंधी विक्रेते आणि खरेदीदारांनी सारा तपशील आयकर विभागाला आर्थिक वर्षाच्या अखेरीस सादर करणे बंधनकारक आहे,” असे परिपत्रकात नमूद आहे.
विक्रेते आणि खरेदीदारांसाठी एक स्वतंत्र नमुना तयार करण्यात आलेला असून, त्यात सर्व आवश्यक माहिती भरून स्वाक्षरी करून, स्कॅन करून ‘कावेरी-2’ सॉफ्टवेअरवर अपलोड करावी लागेल. संपूर्ण आर्थिक वर्षात नोंदणीकृत मालमत्ता व्यवहारांची आणि खरेदीदार-विक्रेत्यांची माहिती ‘61-अ’ नमुन्यात आयकर विभागाला सक्तीने सादर करावी लागेल, असेही परिपत्रकात सांगण्यात आले आहे.
नोंदणी प्रक्रियेदरम्यान सादर करावयाच्या कागदपत्रे आणि स्वयंघोषणापत्र यांची यादीसुद्धा या परिपत्रकात समाविष्ट करण्यात आली आहे. ही सर्व माहिती दिल्यानंतरच दस्तऐवजांची नोंदणी पूर्ण होईल आणि संबंधितांना दस्तऐवज हस्तांतरित केला जाईल. अन्यथा दस्तऐवज देण्यास मनाई करण्यात आली आहे.
मालमत्ता खरेदीविषयक तपशील आयकर विभागाला सादर करण्याची प्रथा आधीपासूनच अस्तित्वात होती. मात्र, या तपशिलांचे सादरीकरण नियमित होत नव्हते. त्यामुळे आयकर विभागाकडून वारंवार हरकत नोंदवली जात होती. त्यामुळेच हा कठोर नियम जारी करण्यात आल्याचे समजते. या नियमामुळे आयकर फसवणुकीला आळा बसणार आहे.
