लग्नानंतर अवघ्या 15 मिनिटांत नवरदेवाचा हृदयविकाराने मृत्यू ...!

जमखंडी : लग्नानंतर अवघ्या 15 मिनिटांत नवरदेवाचा हृदयविकाराच्या झटक्याने मृत्यू झाला. मन हेलवणारी ही घटना जमखंडी येथील नंदिकेश्वर मंगल कार्यालयात घडली.
प्रविण कुरणे (वय 26) असे या दुर्दैवी नवरदेवाचे नाव आहे.

जमखंडी तालुक्यातील कुंभारहळ्ळी गावचे रहिवासी (सध्या राहणार जमखंडी) प्रवीण यांचा विवाह बेळगाव जिल्ह्यातील अथणी तालुक्यातील पार्थणहळ्ळी येथील सख्ख्या मावसबहिणीच्या मुलीशी झाला.
वधू-वराच्या डोईवर अक्षता पडल्या आणि त्यानंतर अवघ्या 15 मिनिटांत हृदयविकाराने नवरदेवाचा मृत्यू झाला. लग्नाचा आनंद एका क्षणात दुःखात बदलला.

प्रविण यांचा विवाह मोठ्या थाटात पार पडला. वराने वधूला मंगळसूत्र बांधले. त्यानंतर वधू-वर फोटोसाठी स्टेजवर उभे असतानाच वराच्या छातीत कळ आली आणि तो खाली कोसळला. कुटुंबीयांनी त्यांना तातडीने रुग्णालयात दाखल केले, पण तोपर्यंत उशीर झाला होता. डॉक्टरांनी त्यांना मृत घोषित केले.
लग्नात शुभाशीर्वाद देण्यासाठी आलेल्या नातेवाईक, पै पाहुणे आणि मित्रपरिवाराला वराच्या अंत्यसंस्कारात सहभागी व्हावे लागले.