यत्नाळ यांच्या निलंबनविरोधात जनताच उत्तर देईल : आमदार लक्ष्मण सवदी

चिक्कोडी (बेळगाव): बसनगौडा पाटील यत्नाळ यांच्या निलंबनविरोधात जनताच ठोस उत्तर देईल असे अथणीचे आमदार लक्ष्मण सवदी म्हणाले.

यत्नाळ यांच्या निलंबनामुळे उत्तर कर्नाटकमध्ये उलट-सुलट साद-पडसाद उमटत असून मनपरिवर्तनाला सुरूवात झाली आहे. आता या भागातील जनता परिस्थितीनुसार भाजपला काय उत्तर द्यायचं ते पुढे ठरवेल, असे सूचक वक्तव्य अथणीचे आमदार लक्ष्मण सवदी यांनी केले आहे.

अथणी तालुक्यातील झुंजरवाड गावात सुरू असलेल्या अम्माजेश्वरी उपसा सिंचन प्रकल्पाच्या जॅकवेल कम पंप हाऊसच्या बांधकामाच्या पूजनानंतर माध्यमांशी बोलताना त्यांनी हे वक्तव्य केले.

पक्षातील अंतर्गत गोष्टींबाबत चर्चा करणं योग्य नाही,
आज मी काँग्रेस पक्षाचा सदस्य आहे. दुसऱ्या पक्षाबद्दल चर्चा करणं किंवा विचार करणं योग्य नाही. त्या पक्षात काय घडतंय हे पाहणं त्यांचं काम आहे. मी पूर्वी भाजपमध्ये होतो, पण आता नाही. सध्या मी काँग्रेसचा आमदार आहे. त्यामुळे त्या पक्षाच्या अंतर्गत गोष्टींबाबत बोलणं योग्य वाटत नाही, असं त्यांनी स्पष्ट केलं.

वक्फचा विषय संपलेला आहे. एनडीए शिवाय सर्वच पक्षांनी या कायद्याला विरोध दर्शवला आहे. बहुमत असल्यामुळे एनडीए सरकारने तो कायदा संमत केला. याचे फायदे-तोटे काय होतील हे येणाऱ्या काळात दिसून येईल. काही लोक न्यायालयात जाण्याची तयारी करत आहेत. काय घडतंय ते पाहूनच मी यावर पुढे प्रतिक्रिया देईन."असे केंद्र सरकारने वक्फ कायद्यात केलेल्या सुधारणांबद्दल बोलताना ते म्हणाले.

भाजप सोडून काँग्रेसमध्ये प्रवेश करताना मतदारसंघाच्या विकासासाठी निधीची मागणी केली होती. त्यावेळी तीन प्रमुख मागण्या मांडण्यात आल्या होत्या. यापैकी दोन मागण्या मुख्यमंत्री सिद्धरामय्या यांनी पूर्ण केल्या असून एक मागणी अद्याप प्रलंबित आहे, असे अथणी मतदारसंघाला मिळालेल्या निधीबद्दल बोलताना ते म्हणाले.