राज्यातील विविध ठिकाणी लोकायुक्तांचे छापे : शासकीय अधिकाऱ्यांमध्ये खळबळ

बेंगळूर : लोकायुक्त पोलिसांनी आज राज्यातील विविध ठिकाणी छापे टाकून झाडाझडती चालविली आहे.
लोकायुक्त पोलिसांनी आज गुरुवारी सकाळपासूनच कोलार, यादगिरी, दावणगेरे आणि बेंगळूरमधील विविध भागात छापे टाकले.

उत्पन्नापेक्षा अधिक संपत्ती मिळवणे तसेच भ्रष्टाचाराच्या आरोपांशी संबंधित प्रकरणांसंबंधी लोकायुक्त पोलिसांनी हे धाडसत्र अवलंबले आहे.

या छाप्यामुळे राज्यभरातील शासकीय अधिकाऱ्यांमध्ये खळबळ माजली आहे.

लोकायुक्त पोलिसांनी कोलार तालुक्यातील भूमापन विभागाचे सर्वेक्षक अधिकारी सुरेश बाबू जी., सुरपूर तालुक्याचे आरोग्य अधिकारी डॉ. राजीव वेंकटप्पा नायक, कर्नाटक नगर जलपुरवठा व सांडपाणी मंडळ (दावणगेरे) चे सहायक कार्यकारी अभियंता एम.बी. रवि, तसेच जलसंपदा विभागाचे सहायक कार्यकारी अभियंता जी. श्रीनिवास मूर्ती यांच्या निवासस्थानांवर आणि कार्यालयांवर छापे टाकून झडती चालवली आहे.
या धाडीत महत्वाचे कागदपत्रे, मालमत्तेची कागदपत्रे आणि अन्य पुरावे जप्त करण्यात येण्याची शक्यता आहे.