व्यावसायिक सिलेंडर दरवाढीविरोधात लक्ष्मी हेब्बाळकर यांची केंद्रावर जोरदार टीका

बेळगाव : व्यावसायिक सिलेंडर दरवाढीविरोधात राज्याच्या महिला आणि बालकल्याण खात्याच्या मंत्री लक्ष्मी हेब्बाळकर यांची केंद्रावर सडकून टीका केली आहे. केंद्राने पाच राज्यातील निवडणुका पार पडल्यानंतर लगेचच व्यावसायिक सिलेंडर दरवाढ करून जनविरोधी निर्णय घेतला आहे, हे संतापजनक असल्याचे लक्ष्मी हेब्बाळकर यांनी म्हटले आहे.

व्यावसायिक गॅस सिलेंडरचा दर 2162 रुपयांवरून थेट
3153 रुपये करून केंद्राने सर्वसामान्य व्यावसायिकांची गळचेपी केली आहे. केंद्र सरकारचा हा निर्णय जनविरोधी आहे, असे म्हणत मंत्री लक्ष्मी हेब्बाळकर यांनी केंद्राच्या लोकविरोधी निर्णयावर जोरदार शाब्दिक प्रहार केला आहे.

पत्रकारांशी बोलताना त्या म्हणाल्या, "अशा प्रकारची दरवाढ यापूर्वी कधीही पाहिली नाही. काही राज्यांमध्ये निवडणुका पार पडल्यानंतर लगेचच असा जनविरोधी निर्णय घेणे म्हणजे जनतेला दिलेल्या आश्वासनांवर पाणी फेरण्यासारखे आहे."

व्यावसायिक सिलेंडर दरवाढ हा हॉटेल उद्योगाला आणि सर्वसामान्य लोकांच्या जीवनाला बसलेला थेट फटका आहे. हॉटेल मालक आधीच दरवाढीने ग्रासले आहेत. या निर्णयामुळे खाद्यपदार्थांच्या किमती आणखी वाढतील. परिणामी, आपले दैनंदिन जीवन जगणाऱ्या सर्वसामान्य लोकांना अडचणींचा सामना करावा लागणार आहे, असेही
लक्ष्मी हेब्बाळकर म्हणाल्या.
केंद्र सरकार निवडणुकांनंतर पुन्हा एकदा जनतेची फसवणूक करत आहे. लोकांचे जगणे असह्य होण्याआधी केंद्राने सर्वसामान्यांचा विचार करून तात्काळ भाववाढ नियंत्रणात आणण्यासाठी कारवाई करण्याची मागणी मंत्री लक्ष्मी हेब्बाळकर यांनी केली आहे.