चाकूने भोसकून विद्यार्थ्याचा खून

हुबळी : क्षुल्लक कारणावरून झालेल्या वादाचे पर्यवसान खुनात झाले. इयत्ता सहावीत शिकणाऱ्या अल्पवयीन विद्यार्थ्याने नववीत शिकणाऱ्या आपल्या मित्राचा चाकूने भोसकून खून केला. ही धक्कादायक घटना काल सोमवारी रात्री हुबळी येथील गुरुसिद्धेश्वर नगरातील मुरसावीर मठाजवळ घडली.

डिजे आणि लाईटिंगच्या किरकोळ वादातून दोघांमध्ये वाद झाला आणि वाद विकोपाला गेला. यामध्ये सहावीत शिकणाऱ्या 12 वर्षीय मुलाने घरी जाऊन चाकू आणला आणि रागाच्या भरात नववीत शिकणाऱ्या आपल्या मित्रावर वार केला. गंभीर जखमी विद्यार्थ्याला केएमसीआरआय रुग्णालयात नेण्यात आले, मात्र उपचारापूर्वीच त्याचा मृत्यू झाला.

मृत मुलगा हा आई-वडिलांचा एकुलता एक मुलगा होता. त्याचे पालक रस्त्यावर भाजी विक्री करून उदरनिर्वाह करतात. हल्ला करणाऱ्या मुलाचे कुटुंबही अतिशय गरीब आहे. आपल्या मुलाचा खून झाल्याचे समजताच मुलाच्या आईने एकच आक्रोश केला होता.