60 वर्षे झाली, पण नुकसानभरपाई नाही : शेतकऱ्यांनी ठोठावला न्यायालयाचा दरवाजा : जिल्हा आरोग्य अधिकाऱ्यांची कार जप्त

बेळगाव (bn7 news): रुग्णालयाकरिता जमीन देऊन 60 वर्षे झाली, पण जमिनीच्या मोबदल्यात नुकसानभरपाई मिळाली नाही. यामुळे संतप्त शेतकऱ्यांनी नुकसानभरपाई मिळावी यासाठी न्यायालयाचा दरवाजा ठोठावला आणि शेतकऱ्यांना न्याय मिळाला. या प्रकरणात न्यायालयाने कठोर भूमिका घेत जिल्हा आरोग्य अधिकाऱ्यांची (DHO) शासकीय कार जप्त करण्याचे आदेश दिले.

फकीरप्प तळवार, मल्लिकार्जुन तळवार आणि अशोक तळवार या तिघा शेतकऱ्यांनी रुग्णालयासाठी आपली जमीन दिली होती. मात्र, 60 वर्षे लोटली तरी जमिनीच्या बदल्यात नुकसानभरपाई मिळाली नाही. अखेर या शेतकऱ्यांनी न्यायालयात न्याय मागितला. न्यायालयाने नुकसानभरपाई न दिल्याबद्दल नाराजी व्यक्त करत जिल्हा आरोग्य अधिकाऱ्यांची कार जप्त करण्याचे आदेश दिले.

न्यायालयीन आदेशानुसार हे शेतकरी आपल्या वकिलांसोबत कार जप्तीसाठी पोहोचताच, कारचालक वाहन घेऊन पसार झाला होता. यामुळे संतप्त वकिलांनी आणि शेतकऱ्यांनी अधिकार्‍यांची कानउघाडणी केली. अखेर अधिकाऱ्यांनी जप्तीसाठी तीच कार पुन्हा आणून दिली.

न्यायालयाचा निर्णय आणि जिल्हा आरोग्य अधिकाऱ्यांची कार जप्ती हा विषय चांगलाच चर्चिला जात आहे.