कित्तूरमध्ये नवीन बस आगाराचे उद्घाटन : 15 नव्या बस गाड्या केल्या गेल्या लोकार्पित

कित्तूर : चन्नम्मा कित्तूर येथे नव्याने उभारलेल्या बस आगाराचे उद्घाटन परिवहन व मजुराई मंत्री रामलिंग रेड्डी यांच्या हस्ते करण्यात आले. उद्घाटन सोहळा डेपो परिसरात संपन्न झाला.
यावेळी परिसरासाठी 15 नव्या बसगाड्यांचे लोकार्पण करण्यात आले.

सार्वजनिक हिताच्या योजना आणि मजबूत पायाभूत सुविधा देत नागरिकांचे जीवनमान उंचावण्यावर सरकारचा भर असल्याचे मंत्री रामलिंग रेड्डी यांनी यावेळी बोलताना म्हटले.

सुमारे 5 कोटी रुपयांच्या खर्चातून हा अत्याधुनिक असा चन्नम्मा कित्तूर डेपो उभारण्यात आला आहे. भविष्यात डेपो परिसरात पेट्रोल पंप उभारण्याची योजना आहे.
डेपोच्या परिसरात काँक्रीट फ्लोअरिंग लवकरच करण्यात येणार आहे, अशी माहितीही परिवहन व मजुराई मंत्री रामलिंग रेड्डी यांनी यावेळी बोलताना दिली.
मागील आणि सध्याच्या कार्यकाळात राज्य सरकारने वाहतूक क्षेत्रात मोठ्या प्रमाणावर विस्तार केला आहे. दहा हजारांहून अधिक कर्मचाऱ्यांची भरती तसेच गेल्या तीन वर्षांत 1200 नव्या बसची भर घालण्यात आली आहे. याआधी बेळगावमध्ये केंद्रीय व शहर बसस्थानकांचे उद्घाटनही करण्यात आले आहे, असेही त्यांनी सांगितले.
ग्रामीण भागातील नागरिक आणि विद्यार्थ्यांच्या प्रवासाच्या अडचणी दूर करणे हा नवीन डेपोचा मुख्य उद्देश आहे, असे सांगत नव्याने सुरू करण्यात आलेल्या 15 बसगाड्या ग्रामीण भाग व शाळकरी विद्यार्थ्यांना अधिकाधिक सेवा देणाऱ्या ठराव्यात, असेही मंत्री रामलिंग रेड्डी म्हणाले.
कार्यक्रमात उपस्थित असलेले आमदार बाबासाहेब पाटील यांनी बस डेपोचा हा दीर्घकालीन प्रलंबित प्रश्न मार्गी लागल्याबद्दल आनंद व्यक्त केला. त्यांनी कित्तूर बसस्थानकातील उर्वरित कामांसाठी अतिरिक्त निधी तसेच शहरातील वाहतूक सुधारण्यासाठी मिनी बस देण्याची मागणीही यावेळी केली.
या कार्यक्रमाला एनडब्ल्यूकेआरटीसीचे उपाध्यक्ष सुनील हनुमन्नावर, हमी योजना अंमलबजावणी प्राधिकरणाचे जिल्हाध्यक्ष विनय नावलगट्टी, व्यवस्थापकीय संचालक प्रियंगा एम., अतिरिक्त पोलीस अधीक्षक आर.बी. बसरगी यांच्यासह अनेक अधिकारी व स्थानिक नागरिक मोठ्या संख्येने उपस्थित होते.