बोगस डॉक्टरांना आरोग्य विभागाचा दे धक्का ....!

चिक्कोडी : ग्रामीण भागात बोगस डॉक्टरांनी बऱ्यापैकी आपले बस्तान बसविले आहे. लोकांच्या आरोग्याशी खेळणाऱ्या या बोगस डॉक्टरांना जिल्हा आरोग्य विभागाने दमदार धक्का दिला आहे.

जिल्हा आरोग्य अधिकारी (DHO) डॉ. ईश्वर गडाद यांच्या नेतृत्वाखाली सात पथकांनी गावातील रुग्णालये आणि दवाखान्यांवर एकाच वेळी छापे टाकून तेथील कागदपत्रे, औषधे आणि उपचार पद्धतींची तपासणी केली. यामुळे बोगस डॉक्टरांचे धाबे दणाणले आहेत.

उपायुक्तांच्या सूचनेनुसार आरोग्य विभाग, KPME, तालुका आरोग्य अधिकारी, महसूल विभाग आणि पोलिसांचा समावेश असलेल्या सात पथकांनी दिवसभर रुग्णालयांची पाहणी केली. औषधांचा साठा, डॉक्टरांची शैक्षणिक पात्रता, रुग्णालयांचे परवाने यांची सखोल चौकशी करण्यात आली.

तपासणीदरम्यान काहीजणांनी वैद्यकीय शिक्षण घेतलेले नसतानाही दवाखाने थाटल्याचे निदर्शनास आले. पथके येत असल्याची माहिती मिळताच काही तथाकथित डॉक्टरांनी रुग्णालये सोडून पळ काढल्याची माहिती समोर आली आहे.

चिक्कोडी तालुक्यातील करोशी येथील एका रुग्णालयांवर या पथकाने छापा टाकून पाहणी केली. तपास पूर्ण झाला असून अहवाल जिल्हा समितीकडे पाठवला जाईल. बेकायदेशीर काम करणाऱ्यांवर कडक कारवाई करण्यात येईल,” असे जिल्हा आरोग्य अधिकारी डॉ. गडाद यांनी सांगितले आहे.

वैद्यकीय शिक्षण नसताना बेळगाव तालुक्यातही अनेक बोगस डॉक्टरांनी दवाखाने थाटल्याची माहिती उपलब्ध आहे. विना परवाना रुग्णांवर उपचार करणाऱ्या अशा डॉक्टरांचा शोध घेऊन आरोग्य विभागाने त्यांच्यावर उपचार करावेत, अशी मागणी सुज्ञ नागरिकांतून केली जात आहे.