हसिरू सेना खानापूर तालुकाध्यक्षपदी महावीर तवनप्पा गौडर यांची निवड

खानापूर : कर्नाटक राज्य शेतकरी संघटना, हसिरू सेना (वासुदेव मेटी गट) तालुका अध्यक्षपदी कसमळगी गावचे महावीर तवनप्पा गौडर यांची निवड करण्यात आली आहे. जिल्हाध्यक्ष कल्मीश गोकाक यांनी नियुक्तीचा हा आदेश जारी केला.

हसिरू सेना (वासुदेव मेटी गट) जिल्हाध्यक्ष कल्मीश गोकाक यांच्या सूचनेनुसार खानापूर तालुका पदाधिकाऱ्यांची निवड करण्यात आली आहे.
गंदिगवाड गावचे बसवराज तम्मन्ना बंगी यांची उपाध्यक्षपदी, कसमळगी गावचे अप्पाजी माडकर यांची मुख्य सचिव पदी, एम. एम. राजीबाई यांची संघटना सचिवपदी, इसाक दावलसाब साहेबखान यांची खजिनदारपदी आणि चिक्क अंगरवळ्ळी गावचे बसवराज चंद्रप्पा मादिगर यांची पदाधिकारी म्हणून नियुक्ती करण्यात आली.
गंदिगवाड येथे आयोजित शेतकरी संघटनेच्या बैठकीत नवनियुक्त पदाधिकाऱ्यांना नियुक्तीपत्रांचे वितरण करण्यात आले.
यावेळी गोकाक तालुका अध्यक्ष गोपाल, मूडलगी तालुका अध्यक्ष भीमसी, राज्य महिला मुख्य सचिव कमला पाटील, जिल्हा प्रधान सचिव देवीप्रसाद मुलिमनी यांच्यासह अनेक शेतकरी नेते उपस्थित होते.

कर्नाटक राज्य शेतकरी संघटना हसिरू सेना (वासुदेव मेटी गट) या संघटनेचे राज्यस्तरीय संघटन बांधणीचे कार्य जोमाने सुरू असून शेतकऱ्यांवर विविध क्षेत्रांत होत असलेल्या अन्यायाविरोधात आवाज उठवून त्यांना न्याय मिळवून देण्यासाठी संघटनेच्या माध्यमातून प्रयत्न केले जात आहेत. राज्याच्या सीमावर्ती खानापूर तालुक्यात नव्या पदाधिकाऱ्यांची निवड करून संघटना अधिक बळकट केली जाणार असल्याचे यावेळी बोलताना जिल्हाध्यक्ष कल्मीश गोकाक यांनी सांगितले.
शेतकऱ्यांनी आपल्या समस्या संघटनेच्या पदाधिकाऱ्यांपर्यंत पोहोचवाव्यात. कोणताही मुलाहिजा न ठेवता त्यावर योग्य ती कारवाई करण्यात येईल, असेही त्यांनी स्पष्ट केले.