अस्वलासह पिल्लांनी केला हल्ला : शेतकरी गंभीर जखमी

खानापूर ( bn7 news) : गुढीपाडव्यासाठी लागणारी कडुलिंब आणि आंब्याची पाने आणण्यासाठी शिवारात गेलेल्या शेतकऱ्यावर अस्वलासह त्या अस्वलाच्या दोन पिल्लांनी हल्ला केला. या हल्ल्यात शेतकरी जखमी झाला असून त्याला उपचारासाठी इस्पितळात दाखल करण्यात आले आहे.

विलास चिकलकर ( वय 55, राहणार चिगुळे ) असे अस्वलाच्या हल्ल्यात जखमी झालेल्या व्यक्तीचे नाव आहे. बेळगाव जिल्ह्यातील कणकुंबी वनक्षेत्रांतर्गत येणाऱ्या चिगुळे गावात ही घटना घडली आहे.

विलास चिकलकर हे गुढीपाडव्यासाठी लागणारी कडुलिंब आणि आंब्याची पाने आणण्यासाठी रानात गेले होते. यावेळी
एका मोठ्या अस्वलाने आणि त्यांच्या दोन पिल्लांनी त्यांच्यावर हल्ला केला. अस्वलांनी त्यांच्या चेहऱ्याचा चावा घेतल्याने ते गंभीर जखमी झाले.

अस्वलाच्या हल्ल्याची माहिती मिळताच, कणकुंबी आरएफओ शिवकुमार यांनी घटनास्थळी भेट देऊन पाहणी केली. त्यांनी रुग्णवाहिका बोलावली आणि जखमी व्यक्तीला बेळगावमधील एका खाजगी रुग्णालयात दाखल केले आहे.