मर्यादा ओलांडू नका : सिद्ध, डिकेशिना हायकमांडने खडसावले

बेंगळुर : काँग्रेस हायकमांडने कर्नाटक राज्याचे मुख्यमंत्री सिद्धरामय्या आणि उपमुख्यमंत्री डी.के. शिवकुमार यांना चांगलेच खडसावले असून आपल्या मर्यादा ओलांडू नका अशा शब्दात त्यांना सुनावण्यात आले आहे.

पक्ष आणि सरकारवर होणारा विपरीत परिणाम टाळण्यासाठी प्रशासनावर लक्ष केंद्रित करण्याच्या सूचना हाय कमांडकडून देण्यात आल्या आहेत. पक्षाला कॅडर-बेस्ड यंत्रणेत रूपांतरित करण्याच्या दिशेने काँग्रेस वरिष्ठांनी निर्णायक पावले उचलण्यास सुरुवात केली आहेत.

अहमदाबाद येथे दिनांक 8 आणि 9 एप्रिल रोजी होणाऱ्या एआयसीसी अधिवेशनाच्या पार्श्वभूमीवर ही कानउघाडणी महत्त्वाची ठरली आहे. दिल्ली भेटीदरम्यान सिद्धरामय्या आणि शिवकुमार यांच्याशी हायकमांडने चर्चा केली. मुख्यमंत्री सिद्धरामय्या यांच्या निकटवर्तीय आणि सहकारमंत्री के.एन. राजण्णा यांच्यावरील हनी ट्रॅपच्या आरोपावरून ही नाराजी उद्भवली आहे. सिद्धरामय्या यांनी हे प्रकरण प्रभावीपणे हाताळले नाही, त्यामुळे पक्ष आणि सरकारची प्रतिमा मलीन झाली, असे हायकमांडचे मत आहे.

राहुल गांधी यांनी भाजपच्या हातात कोणतीही संधी जाऊ नये, यासाठी सावध राहण्याचा सल्ला दिला. तसेच, निवडणुकीपूर्वी दिलेल्या पाच आश्वासनांच्या प्रभावी अंमलबजावणीबाबतही ते ठाम होते. राज्यातील चार महसूल विभागांमध्ये लाभार्थी मेळावे घेण्याचेही त्यांनी सुचवले.

राहुल गांधी यांनी दिल्लीतील बैठकीत सिद्धरामय्यांवर नाराजी व्यक्त केली असल्याचे समजते. एआयसीसीचे सरचिटणीस (संघटना) के.सी. वेणुगोपाल यांनी गृहमंत्री डॉ. जी. परमेश्वर यांना तातडीने आणि संवेदनशीलपणे प्रकरण हाताळण्याचे निर्देश दिले.

दरम्यान, एसटी महामंडळ घोटाळ्यातील आरोपांमुळे राजीनामा दिलेले माजी मंत्री बी. नागेंद्र यांना पुन्हा मंत्रिमंडळात घेण्यास राहुल गांधी यांनी विरोध दर्शवला.

शुक्रवारी सिद्धरामय्या यांनी एआयसीसी अध्यक्ष मल्लिकार्जुन खरगे यांची भेट घेतली. चार आमदारांच्या नामनिर्देशनाबाबत, तसेच केपीसीसी अध्यक्षपदासह विविध मुद्द्यांवर चर्चा झाली. जिल्हा व तालुका पंचायतीसाठी निवडणुका होईपर्यंत डी.के. शिवकुमार यांनी अध्यक्षपद सांभाळावे, असे खर्गे यांनी स्पष्ट केले. मात्र, पक्षातील काही आमदार शिवकुमार यांच्या अध्यक्षपदाच्या विरोधात असून, यासंदर्भात सिद्धरामय्यांनी हायकमांडकडे तक्रार केली आहे.

हायकमांडने निर्णय घेतल्यास, ऑक्टोबर-नोव्हेंबर 2025 मध्ये सरकारचे अडीच वर्षे पूर्ण होताच, शिवकुमार राजीनामा द्यायला तयार असल्याचेही समजते.