गृहलक्ष्मीच्या जानेवारी महिन्याच्या हप्त्याचे वितरण; फेब्रुवारीचा हप्ता एप्रिलच्या दुसऱ्या आठवड्यात खात्यावर होणार जमा : मंत्री लक्ष्मी हेब्बाळकर यांची माहिती

बेळगाव ( bn7 news) : कर्नाटकातील महिलांसाठी महत्त्वाच्या असलेल्या गृहलक्ष्मी गॅरंटी योजनेचा जानेवारी महिन्याचा हप्ता लाभार्थ्यांच्या खात्यावर जमा करण्यात आला आहे. महिला आणि बालकल्याण मंत्री लक्ष्मी हेब्बाळकर यांनी ही माहिती दिली आहे.

ट्रेझरी विभागाकडून महिला आणि बालकल्याण विभागाला 2500 कोटी रुपयांची तरतूद करण्यात आली आहे. त्यामुळे फेब्रुवारी महिन्याचा हप्ता एप्रिलच्या दुसऱ्या आठवड्यात खात्यात जमा केला जाईल, असे लक्ष्मी हेब्बाळकर यांनी स्पष्ट केले.

मंगळवारी बेळगावमध्ये पत्रकारांशी बोलताना मंत्री हेब्बाळकर म्हणाल्या की, "गृहलक्ष्मी योजनेचा जानेवारी महिन्याचा हप्ता सोमवारी (1 एप्रिल रोजी ) लाभार्थ्यांच्या खात्यात जमा झाला आहे. फेब्रुवारी महिन्याच्या हप्त्यासाठी तयारी सुरू आहे आणि निधी उपलब्ध झालेला आहे. लवकरच, म्हणजेच एप्रिलच्या दुसऱ्या आठवड्यात फेब्रुवारीचा हप्ता देखील जमा होईल," असे त्यांनी सांगितले आहे.