विहिरीत पडून शेतकऱ्याचा मृत्यू ...!

चिक्कोडी : पाणी आणण्यासाठी गेलेल्या शेतकऱ्याचा विहिरीत पडून मृत्यू झाला. जहांगिर सरदार पटेल (वय 50) असे मृत शेतकऱ्याचे नाव आहे.
चिक्कोडी तालुक्यातील करोशी गावात ही घटना घडली आहे.

जहांगिर पटेल हे आपल्या शेतात पिकांना पाणी देण्यासाठी गेले होते. यावेळी विहिरीजवळ उभे असताना त्यांचा तोल जाऊन ते खोल विहिरीत पडले.
संध्याकाळपर्यंत जहांगिर घरी परत न आल्याने कुटुंबीयांना चिंता वाटू लागली. त्यांनी तातडीने शेतात धाव घेतली. शोध घेत असताना त्यांचा मृतदेह विहिरीत आढळून आला. घटनेची माहिती मिळताच गावातील नागरिक, नातेवाईक मोठ्या संख्येने घटनास्थळी जमले.
त्यानंतर पोलिसांना कळवण्यात आले. पोलिस आणि चिक्कोडी अग्निशमन दलाचे जवान घटनास्थळी दाखल झाले. सुमारे रात्री 11 वाजण्याच्या सुमारास बचाव पथकाने मृतदेह विहिरीतून बाहेर काढला.
मृतदेह उत्तरीय तपासणीसाठी चिक्कोडी सरकारी रुग्णालयात पाठवण्यात आला आहे.
त्यांच्या पश्चात पत्नी, दोन मुले आणि एक मुलगी असा परिवार आहे. या घटनेमुळे संपूर्ण गावात हळहळ व्यक्त होत आहे.