' डान्सिंग प्ले ' चा अपघात : 18 जखमी, 4 जण गंभीर : यात्रेत घडली घटना

गदग : ' डान्सिंग प्ले ' चा खेळ खेळताना दोन बोग्या सरकल्या आणि झालेल्या अपघातात 18 जण जखमी झाले. यातील दोघेजण गंभीर आहेत. गदग येथील तोन्टदार्य मठाच्या परिसरात भरलेल्या यात्रेत रविवारी रात्री 9 च्या दरम्यान ही घटना घडली आहे.
यात्रेत काही जण आकाश पाळणा खेळत होते. काही लोक डान्सिंग प्ले चा खेळ खेळत होते. यावेळी डान्सिंग प्ले च्या दोन बोग्या वर उचलल्या गेल्या आणि या अपघातात अठरा जण जखमी झाले. यापैकी चौघांची प्रकृती गंभीर आहे.

जखमींना गदग वैद्यकीय विज्ञान संस्था तसेच हुबळी येथील किम्स रुग्णालयात दाखल करण्यात आले आहे. जखमींपैकी दोघे कोप्पळ जिल्ह्यातील, एक तुमकूर जिल्ह्यातील तर उर्वरित गदग जिल्ह्यातील असल्याची माहिती मिळाली आहे.

या घटनेला जबाबदार असलेल्या मनोरंजन खेळांसाठी टेंडर घेतलेल्या ठेकेदारावर आणि जत्रा समितीच्या पदाधिकाऱ्यांवर कठोर कारवाई करावी, अशी मागणी हिंदू वीरशैव लिंगायत युवा मंचाच्या कार्यकर्त्यांनी केली आहे.
निष्पाप लोकांच्या जीवाशी खेळ करणाऱ्या जत्रा समिती आणि नगरपालिकेच्या अधिकाऱ्यांवर पोलिसांनी कडक कारवाई करावी. अन्यथा गदग बंदची हाक दिली जाईल, असा इशारा मंचचे राज्य संयोजक राजू खानप्पनवर यांनी दिला आहे.