व्यावसायिक एलपीजी सिलेंडर दरात पुन्हा वाढ : हॉटेल्स, रेस्टॉरंट्स व्यावसायिकांना बसणार फटका

बेंगळूर  : व्यावसायिक एलपीजी सिलेंडर दरात पुन्हा वाढ करण्यात आली असून ही दरवाढ आजपासून लागू करण्यात येत आहे. या दरवाढीचा फटका हॉटेल्स, रेस्टॉरंट्स आणि लहान व्यापाऱ्यांना बसणार आहे. या वाढीमुळे खाद्यपदार्थांच्या किमती वाढण्याची शक्यता आहे.

व्यावसायिक एलपीजी सिलेंडर दरवाढ ही हॉटेल्स, रेस्टॉरंट्स आणि लहान व्यावसायिकांना थेट आर्थिक परिणाम करणारी असल्याने व्यावसायिकांतून नाराजीचा सूर उमटत आहे. आधीच जीवनावश्यक वस्तुंच्या किंमती वाढल्या आहेत त्यात सिलेंडर दरवाढ म्हणजे जणू दुष्काळात तेरावा महिना म्हणावा लागणार आहे.
इराण-इस्रायल युद्धानंतर भारतात एलपीजी सिलिंडर मिळणे कठीण झाले असून, परिस्थिती अजूनही तशीच आहे. दरम्यान, 1 मे पासून लागू होणाऱ्या व्यावसायिक एलपीजीच्या निर्बंधांमुळे सर्वसामान्यांवर आणखी एक भार पडला आहे.
1 मे पासून व्यावसायिक सिलेंडरच्या दरात 993 रुपयांची वाढ करण्यात आली आहे.
ऊर्जा कंपन्यांच्या मते, ही दरवाढ अलीकडील जागतिक तेल आणि वायू बाजारातील अस्थिरता, पुरवठा साखळी खर्चातील वाढ आणि विनिमय दरांच्या परिणामामुळे होत आहे.
व्यावसायिक सिलिंडरच्या किमती गगनाला भिडल्या असल्या तरी, 14.2 किलोच्या घरगुती सिलिंडरच्या दरात कोणताही बदल झालेला नाही. सरकारी अनुदान आणि नियामक प्रणालीमुळे घरगुती गॅसचे दर स्थिर राहिले आहेत.