कृष्णेचे पाणी आटले: : हिप्परगी बॅरेजमधून सोडण्यात आले 0.10 टीएमसी पाणी

बनहट्टी : कृष्णा नदीच्या पाण्यात लक्षणीय घट झाली असून कृष्णाकाठाचे नागरिक आणि जनावरांसमोर पिण्याच्या पाण्याची समस्या उभी राहण्याची दाट शक्यता होती. यामुळे
रबकवी-बनहट्टी परिसरातील हिप्परगी बॅरेजमधून बॅरेजच्या पुढील भागाकडे सुमारे 0.10 टीएमसी पाणी एका गेटद्वारे सोडण्यात येत आहे.

बॅरेजसमोरील नागरिक व जनावरांना पिण्याच्या पाण्याची समस्या भेडसावू नये यासाठी बेळगाव प्रादेशिक आयुक्तांच्या आदेशानुसार हे पाणी सोडण्यात येत असल्याची माहिती जलाशय सूत्रांनी दिली आहे.
दरम्यान, परिसरातून वाहणाऱ्या कृष्णा नदीतील पाणी मागील दोन दिवसांत घटले होते. मात्र, कर्नाटक–महाराष्ट्र सीमेवरील राजापूर बॅरेजमधून पाणी सोडण्यात येत असल्याने शुक्रवारी नदीच्या पातळीत किंचित वाढ झाली आहे.
नदीच्या पाण्याची पातळी कमी झाल्यामुळे पूर्वी पाण्याखाली गेलेला पूल आता दिसू लागला आहे. त्यामुळे रबकवी बनहट्टी आणि अथणी तालुक्यातील विविध गावांतील ग्रामस्थांना या पुलावरून ये-जा करणे शक्य झाले आहे.