मराठी भाषिकांनी मुख्य प्रवाहात यावे : सतीश जारकीहोळी यांचे आवाहन

बेळगाव : 30 वर्षांपूर्वीच सीमाप्रश्न सुटलेला आहे. आता मराठी भाषिक लोकांनी मुख्य प्रवाहात यावे असे आवाहन करीत सार्वजनिक बांधकाम खात्याचे मंत्री सतीश जारकीहोळी यांनी मराठी भाषिकांच्या भावनांवर मीठ चोळले आहे.

महाराष्ट्र एकीकरण समितीचा निषेध करून अथवा समितीवर बंदी आणून सीमावादाची समस्या सुटणार नाही. समितीवर बंदी आणली की आणखीन वेगळ्या नावाने ते चळवळीत सक्रिय होण्याची शक्यता आहे, असे वक्तव्य करताना 30 वर्षांपूर्वीच सीमाप्रश्न संपलेला आहे. आता केवळ शासनाने योजनाबद्धरित्या वाटचाल करून यावर नियंत्रण आणणे गरजेचे आहे, असे सार्वजनिक बांधकाम खात्याचे मंत्री सतीश जारकीहोळी यांनी म्हटले आहे.ते इतक्यावरच थांबले नाहीत तर मराठी लोकांनी मुख्य प्रवाहात यावे असे आवाहनही त्यांनी केले आहे.

आजच्या कर्नाटक बंद च्या हाकेबद्दल बोलताना त्यांनी,
प्रत्येकाला निषेध करण्याचा अधिकार आहे. तथापि, सामान्य लोकांना कोणत्याही प्रकारची गैरसोय होणार नाही याची दखल घेत निषेध केला तर बरे . महाराष्ट्र एकीकरण समितीवर बंदी घालल्याने वाद सुटणार नाही. जर समितीवर बंदी घातली गेली तर ते पुन्हा वेगळ्या नावाने सक्रिय होण्याची शक्यता आहे. यासाठी सरकारनेच कार्यक्रमाचे नियोजन आणि नियमन करण्यासाठी पुढाकार घ्यावा, असे म्हटले.
सीमेवर महाराष्ट्र सरकारकडून राबविण्यात येणाऱ्या शासकीय योजनांसंदर्भात बोलताना जारकीहोळी म्हणाले , त्या योजना येथील मराठी भाषिकांच्या हिताच्या नाहीत. महाराष्ट्र सरकारने योजना जाहीर केल्या असतील, पण त्यांचा लाभ सर्वांनाच मिळत नाही. राज्य सरकारच्या योजना सर्व भाषिकांपर्यंत पोहोचत आहेत, असे ते म्हणाले.