' फॉलोअर ' चित्रपटावर करवेच्या शिवरामेगौडा कंपूची वक्रदृष्टी : म्हणे, चित्रपट सीमा वाद निर्माण करणारा

बेळगाव : बेळगावच्या महाविद्यालयीन विद्यार्थ्यांनी तयार केलेल्या' फॉलोअर ' चित्रपटावर करवेच्या शिवरामेगौडा कंपूची वक्रदृष्टी पडली असून सीमा वाद निर्माण करणारा चित्रपट असल्याचा आरोप करीत या कंपूने हा चित्रपटाचे प्रदर्शन बंद पाडले.

बेळगावच्या आयनॉक्स सिनेमागृहात, काल शुक्रवारी हा चित्रपट प्रदर्शित झाला आहे . हा चित्रपट सीमावाद निर्माण करणारा असल्याचा आरोप करीत कर्नाटक रक्षक वेदिकाच्या शिवरामेगौडा गटाने निदर्शने करीत चित्रपटाचे प्रदर्शन बंद पाडले. चित्रपटाचे प्रदर्शन रद्द झाल्यानंतर चित्रपट गृह संचालकाने चित्रपट पाहण्यास आलेल्या लोकांचे तिकिटाचे पैसे परत केले.

रॉटरडॅम आंतरराष्ट्रीय चित्रपट महोत्सवात फॉलोअर चित्रपटाचा प्रीमियर शो झाला असून जगभरातील लोकांनी या चित्रपटाची प्रशंसा केली आहे. अशा या चित्रपटात करवेच्या शिवरामेगौडा कंपूला नेमका सीमावाद कुठे दिसला कळले नाही. या कंपूने बेळगावच्या आयनॉक्स सिनेमागृहासमोर निदर्शने करीत चित्रपटाचे प्रदर्शन बंद पाडले.

बेळगाव मध्ये बी.ई. शिक्षण घेणारा विद्यार्थी हर्षद नलवडे याने फॉलोअर हा चित्रपट निर्माण केला आहे. बेळगावच्या लोकांनी, चित्रपट बनवण्यासाठी खूप मेहनत घेतली आहे. या चित्रपटात बद्दल बोलताना चित्रपट निर्माण करणाऱ्या तुकडीने, तीन मित्रांवर आधारित हा चित्रपट आहे. रॉटरडॅम आंतरराष्ट्रीय चित्रपट महोत्सवात या चित्रपटाचा प्रीमियर शो झाला आहे.. हा चित्रपट सीमा वाद निर्माण करणारा असल्याचा आरोप साफ चुकीचा आहे, असे म्हटले आहे.

तर करवे कंपूने हा चित्रपट सीमावाद निर्माण करणारा आहे,असा आरोप करीत चित्रपटावर वक्रदृष्टी टाकताना अप्रत्यक्ष रित्या बेळगावमधील चित्रपटगृहात कन्नड चित्रपट दाखविले जात नाहीत, ही खंत व्यक्त केली आहे. बेळगाव मधील सिनेमा गृहात कन्नड सोडून मराठी, हिंदी आणि इंग्रजी भाषेतील चित्रपट दाखवले गेले तर चित्रपटगृहच बंद पाडण्याचा इशारा या करवे कंपूने देत आपली गरळ ओकली आहे.